O Colexio Profesional de Enxeñaría en Informática de Galicia (CPEIG), en colaboración coas tres universidades galegas (USC, UDC e UVigo), organizou o pasado domingo 17 de febreiro a Olimpíada Informática Galega 2025 (OIG 2025) na Escola Técnica Superior de Enxeñaría da USC. O certame, no que participaron 18 estudantes de Educación Secundaria (ESO), Bacharelato e Formación Profesional de grao medio de toda Galicia, terá o seu punto final este sábado 15 de marzo cunha gala múltiple de entrega de galardóns. Será a partir das 12:00 horas, no Auditorio 1 do edificio CINC da Cidade da Cultura de Galicia (Santiago de Compostela). No seu transcurso concederanse tamén os premios das pasadas edicións da OIG, do Premio Ada Byron e do Concurso Literario de Protección de Datos do CPEIG.
